سولدوز بالاسی گؤزهل جئیران
سؤزلرین نه تانیشدی
کیتابون آشجاغین منله دانیشدی
نه بیللئیدیم بو اورهک سئله قاریشدی
اوخودوقجا اورهگیم غمله باریشدی
###################
یازماییبسان هارالیسان هارداسان
بئله بیلدیم کندلیسن گول پاراسی
دوزدی کی هر گلهن سنه همراز اولماز
آمما گؤردوم سنده منیم تک یارالیسان
سؤزلرین دردله دولوب گیزلین دی دئمهک
آی گولوم سؤیلهگینهن سن او ندهن گؤرسهنمهز
###################
من کیمهم وارمی حالون سن دانیشام
اومودوم وار چوخ اولا
کندلییهم داغ داش اوشاغی نئچه ایللـهردی او داغی
دوققوز آی بوشلاییرام گئجهلر اوخشاییرام
من اوزاقدان اؤلیرهم یایی کنده گئدیرهم
یوردو گؤرجهک اورهگیم چانا گلیر گزیرهم یاتماییرام
###################
وطنیم داردا قالیبدیر خبرون وارمی گؤریم
گؤزو آغلاردی دئسهن دردیوی بیر منده بیلیم
هههه گؤزهل وطنین قایغیسیدیر
هامی دیللـهره دوشوبدو بو دنیزده
هامی ائلده هامی یئرده
باخ آغاجلار قورویوب تزه یارپیز سولئییب
###################
نه قالیب کندهکی یارپیز چیخا بیلسین
اوجا تایا ائله کند ایچره دیکهلسین
یوخساکی ایگده گؤیهرسین
تورکجه اونوتدوقجا بودون کندیلهرین چانی سیخیلدی
او اوجا تایا ییخیلدی
قوجالار غمده چیغیردی
###################
ایگیدین باغری داش اولدو تولکییه آرخاداش اولدو
جاناواریله ایت یولداش اولدر
کیمسه کیمسهنی آتیب بیزلره دونیا یامان اولدو
سسلهدیک بد گلیر ایللهریمیز آی ائلیمیز بیر اویانین
وئرگی وئرمهگده بیزه چوخلاری بیزدهن قاچاق اولدو
ائو ائشیک دؤندو بوزا چوخ سویوق اولدو
###################
سؤز دانیشماق ائل ایچینده یاساق اولدو
قیش گئجه لری کورسو توووندا اوتورماق قدهغندی
کندلره باخدیقجا سن او تانری نه گؤرهندی
اؤلهن اؤلدو اولان اولدو
او اوزون ساچلارا باخ گؤر نهیه دؤندو
باغریمیز لاپ قانا دؤندو
یوخ عشق و حیائیدی بیل اؤلدو
###################
ماراللار یوردونا اووچی ایاق آتدی
وای ...
گونیمیز باغچادا قالدی
اودیکی گون بیزه باتدی
آییمیز گؤر نئجه یاتدی
اولدوزوموزقالمادی آخدی
بودونوم دورمادی اویدو
گؤزومون کؤکی سؤکولدی
اودیرا قانی تؤکولدی
یوخوسی دوردی اکیلدی
###################
او چاغلار کی ییغلیب کهلیگ اوتو داغدا درهردیز
دوغایا جان آپاراردوز
گؤیه قارشی دایاناردوز
دلی جئیرانلاری باشا ییغیبهن کوممه ووراردوز
گولمهگیزدهن داغی سسلر بورویوردو
غمی دیلدهن سورویوردو
###################
بیزده آتلار چاپاراق داغ داشا سیزلاری گودهردیک
سیزی قورتدان قورییاردیک
قورادان حالوا یییهردیک
داشدی بو یوخسا دره بهیه بیزلر دوشونهردیک
نه یامان داغدان آشاردیک
###################
سؤیلهدین داملارینا چیخمیری بهیلر
چالمیر آشیقلار نه سبهبدهن
ائل مارالی بیلمیسهن بوغولوبلار او گؤزهللـهر
بیزلردهن آغری آلانلار
ائلیمیزه جان آپارانلار
###################
قویمیری دوشمن سسلری بیزه یئتیشسین
یارامیز واردی بیتیشسین
بیرلیک گولونون کؤکینین اوسته گؤریرهم اود قالاییبلار
بودونو لاپ تالاییبلار
توکجهنی گؤر نه ائدیبلهر
###################
تورک بودون ائلینی تورنینی کیم آرتاتی گؤی تورک دئئدی بیزه
سؤیله سن بونو ائل بالاسی
هاردان بئله بیر ایش بیزی تاپدی
بو اورهک آغلادی یاندی
باخگینان گؤر نه قارالدی
###################
آی مارال یازیبسان: قار سیزه واغدان گتیرهردی شن اوشاقلار
یوققوشا شیللاغ آتان گول اوشاقلار
آغشاما دهک مین داغی آشان اوشاقلار یوخ دیریشمال اوشاقلار
چرشنبه گونو اودون ازهردی اوجا تونقال قورالی اود اودلییهردی
اود اوستهن آتیلاندا گؤر نه دییهردی:
آتیل ماتیل چرشنبه بختیم آچیل چرشنبه
###################
باش آغریم دیش آغریم سانجیلاریم هاممیسین آتدیم اودا
آل منه ساغلیق وئرا
ایندی خبرین وارمی اوشاقلار نه اولوبلار؟
درده دولوبلار اودا آتیلمیر
قار کیمی سو اولوبلار یانیب کول اولوبلار
هرهسی بیر اوزاق اؤلکییه دوشموش چالیشرلار
غملهرینهن ساریشیرلار
گئجه گوندوز آلیشیرلار
###################
اییرهنلر تئشینی کورسیده گونده
دونیادا اوز چویوروبلر
توپراق ایچده چورویوبلر
داخی یوخدیر قاری ننه دییه بیزلره ناغیل
یوخدیر آشیق سسی ماغیل
هانی شنگول هانی منگول
###################
آنا هاردا؟
وای نه ائدهک سن دئگینهن نئنهمهملی
قالمیشیک ایندی بو چاغدا بئله یئرده
هانی سورمه هانی سوزمه
هانی آتا بابادان قالمیش اثرلر
###################
چالیشاک سن دئدیگین کندی دیریلدهک
او گؤرمهلی کند سسلهسین اینسالاری گؤرهک
تزهدهن بیریاشایاک
و من ....
قیشدا کهلیگدن اؤتور قارلی داغلاری گزهم
یازدا سن کهلیگ اوتون درمهگه من گودهجهم
###################
گئجهلر گینه اگلهنجه قوراک کورسی تووندا
ایستی قولوندا
گینه داغلاردا مارال گزمهگه یوللاری آچاک بیز
شنلیک ائدک بیر
بولاغ اوتو قوشولا یارپیزا قوخو داغیلا
###################
آغرون آغریملا آلینا
داغ باشی قار قالینا
شن اوشاقلار قار داغیدا
ایفتار سووونا قار سالینا
ارده خیتاب پرخاجینان مندهلر داغدا آچیلا
###################
قاوورتماش واردی بویور کئچمه اللـهر دولودو
سؤیلو بولاغی سو چاغیردی
گئدمه دایان: ساری گوللـهر بنؤشهلر بیتدی اینان
بیته بیرلیک گولو داغدا اوبادا چایدا چیمنده
قنمین دیزه چؤکهنده
زمیلر سومبولو قات قات یاتا یای چاغی درهنده
بوغدا دگیرمانه تؤکنده
###################
گولسین اکینچی اوشاغی قووورغا یییهنده
دولسون اوتلاناجاقلار اوتیلان اول زمیلر تک
گؤیده گول پری لر تک
آلسین اؤروشی اینهک، قوزو قویون بئل بئله یاتسین
ارخهجین دؤیرهسینه زیرپی ایتلر هئی دولانسین
خان چوبان آرخایین اولسین
###################
تئز قورولسون اوبالار
غم داغیلسین
سوپوره کومانی قیزلار
گتیره گوهنی اوغلان
آی سورو ائندی چیمنه
آنا گل داوار چیرتمهگه
###################
آی بالا: آغ کئچی قاچدی توتون
قارا قویون دوغمالیدیر هادیر اولون
بایدا دولو سوتیلهن الده آنالار
چوبانیم دور داواری دبهرد تئز آپار
ایندی اینهکلردی گلیر
###################
بیزوولار چاتیدا گؤر نه هایدی
مین بویا واردی چیمنده
اوبانین گؤز باخاریندا
گئجهدی یاتمیشی سورو اوبالارین آراسیندا
او بیری یاندا ناخیردی
شاواغدا قوردلار اولاییر
بیریسی پایین آپاریر
صوبح اولوب وای نه خبردی
###################
قوزو قویون قاریشیبلارامیشه گؤرنه ملهشیر
بیزوو اینکله گؤروشیر
سیز اوبادا بیز دا کتده درهک اوت تایانی گؤیه اوجالداک
سسیمیزی داغلارا سالاک
ائل آدین لاپ اوجالداک
###################
گینه بهیلر چیخا داملارا الده خینه قیرمیزی آلما
قیزارا اول یاناغی
یارینا آلما آتا قیرمیزی شالدا
اوشاقلار گؤر نه قاچاقدا
###################
ال اله گئدمیش ایگیتلر چوپی گئدسین
ایس ایس سسلری گؤیلره چاتسین
دامین اوستونده ماراللار اوتوموش یان یانا قیزلار
چوپی گئدیکده جاوانلار مین گؤزیله داما باخار
سونرا قیزلار...
شووقیله چؤپییه باخسین
گلهجک ارینی تاپسین
هامیسی شن یاشاسین
###################
گینه قیش گلسین اینهک طویلهده دوغسین
خیردا قیز اویناسین اوندا
گلینین گؤیلو آچیلسین
قیزلارین بختی اویانسین
آنا اییسی دام دووار آلسین
اوغلان اوشاق باجا باسسین
###################
بئله قیشدهن قورخوموز یوخ
قوی دؤنه گلسین
آتا یئم اینهگه آتسین
بیزوو اینهگله بؤیورسین
کتدیلره شنلیک آپارسین
###################
گینه آرتیق داغدا قورد آغزینا بیر دادلیق آپارسین
قوشلارا بالیق آپارسین
سئویرهم بیرده گؤرهم من قویونوم کومده اوزانسین
ناز قوزوم کوزده ملهسین
چپیشیم اویناغا گلسین
تایا اوسته تئز یومولسین
گؤزلریم گینه سئوینسین یوخلایا بیلهم
یاز گلیب قار ارییه، گول چیچهک داغ داشا گله
###################
گول اییی داغلاری آلا
گون چیخیب داغلارا باخا
کهلیگلر تئز یووا سالا
قیش چکهن دلی جئیران یینه اوت ایچره اوزه
سورولر داغلارا گئده
###################
شن اولاک شن لیک ائدک یای یازی قیش گوزی بیزلر
دوشمهنیمیزی حقیر ائدهک
اؤلکهمیزی ائدهک آواد
تورکجه شیرین دیللـهره دوشسین
بال آغیزلاردا اوتورسین
اورهکلر غم ایتیرسین
اینک بشنوید حرف دلم را.....